LONDON, AP.- Union Europeo i Gran Bretaña a kritiká otro djamars. Reino Uni a indiká ku ta imposibel pa logra un akuerdo di Brexit, pero insistiendo ku e pais ta trahando riba un pakto, algu mas di tres siman promé ku e fecha kaminda Brexit lo sosodé.
E ofisina di e promé minister britániko Boris Johnson a bisa ku e aktitut di UE a provoká ku e negosiashonnan a paralisá. Aparte di esaki, e ofisina a emití evaluashon di un yamada telefóniko entre Johnson i kansier aleman, Angela Merkel djamars mainta.
E komunikado ta indiká ku Merkel a bisa Johnson ku “un akuerdo ta sumamente improbabel si Reino Uni no permití pa Northern Ireland keda ku e mesun regulashonnan duanero ku UE pa mantené frontera ku Irlanda, miembro di UE, habrí. Esaki a algu ku e akuerdo britániko ta haña inaseptabel.
“Si esaki ta e postura nobo, esei ta nifiká ku un akuerdo ta básikamente imposibel, no awor so, pero pa semper”, asina e komunikado britániko a indiká. E gobièrnu aleman a konfirmá e yamada entre Merkel i Johnson pero no a komentá riba e “kombersashonnan konfidensial” aki.
E bosero di Komishon Europeo Mina Andreeva a bisa ku “e postura di UE no a kambia. Nos kier un akuerdo. Nos ta trahando pa logra un akuerdo ku Reino Uni”. Apesar di e panorama di pesimismo, funshonarionan britániko a insistí ku nan tin speransa ku ta bai logra un akuerdo promé ku e fecha límite pa separá di e bloke, kual a wòrdu fihá riba 31 di òktober.
