BERLIN, ALEMANIA (AFP).- E minister di defensa aleman, Boris Pistorius, a primintí djaweps di hasi Bundeswehr e “wes’i lomba” di defensa kolektivo na Europa”, introdusiendo ideanan nobo ku e invashon ruso di Ukrania na mente.
Pistorius a bisa na Berlin ku “e sosionan di Alemania den Europa, na Norte Amérika i den mundu ta spera ku nos ta asumí nos responsabilidatnan”.
E dokumento di 19 página presentá ayera ta indiká ku Bundeswehr mester ta “bon ekipá pa guera den tur área”, un ekspreshon ku Pistorius a usa resientemente i ku a generá polémika na Alemania.
Ku e “brutal invashon” di Ukrania di parti di Rusia, “guera a regresá den Europa”, segun el a bisa.
Den su maneho, gobièrnu mas aleu ta insistí ku ehérsito mester ta kapas di intervení den esena internashonal, manera ya nan a hasi den wèst di Balkan i den e region afrikano di Sahel.
Berlin ademas a indiká ku “e seguridat di Israel ta un kuestion di Estado” pa Alemania, dunando “hopi importansia na e derechi di Israel pa eksistí”.
E ambishonnan ti un preis: ”gobièrnu aleman a señalá ku ta nesesario pa dediká por lo ménos 2% di PIB na gastu militar pa kumpli ku e metanan di OTAN.
Den añanan 60 e gastu militar a representá 5% di su PIB, kedando bou dje 2% for di 1990.
Pa regresá na 2% “ta nifiká pasa di 50.000 mion euro di gastu militar pa aña pa 70.000 òf 75.000 mion di forma sostenibel, segun Pieter Wezeman dje instituto SIPRI.