PARIS, FRANSIA (AFP).- E representante di Brasil den konferensia di yudansa humanitario pa Gaza, e èks minister Celso Amorim, ayera a boga pa “stòp ku guera” i a bisa ku e morto di míles di mucha den bombardeonan israelí ta pone hende pensa riba genosidio.
Mas di 10.000 persona, den su mayoria sivilnan i entre na mas di 4.000 mucha, a muri bou dje bombardeo israelí riba Gaza, un teritorio di 360 km2 kaminda mas di 2 mion hende ta biba.
“Mi ta insistí riba e kondena di Brasil pa loke ta e atakenan terorista kontra e pueblo israelí i e toma di rehennan. Pero, e aktonan bárbaro ei no ta hustifiká e uso di forsa pa loko kontra di e sivilnan”, segun Amorim a bisa.
“E morto di míles di mucha ta impaktante. “Di forma inevitabel ta bin den nos mente e palabra genosidio”, segun e konsehero dje presidente brasilero Luis Inacio Lula da Silva, durante e evento selebrá na Paris.
Fransia a organisá e konferensia pa reuní e prinsipal donantenan i aselerá e yudansa na Gaza, ku ademas ta registrá un ekseso di su habitantenan pa zùit.
Nashonnan Uní a kalkulá ku tin mester di 1.200 mion dòler di yudansa pa e poblashonnan di Gaza i Cisjordania pa fin dje aña’ki.
E èks-minister di relashonnan eksterior i di defensa brasilero a boga pa “para guera pa motibu humanitario” i pa garantisá entrada sigur di yudansa humanitario pa hospital- i skolnan.
Amorin ta di opinion ku e situashon aktual ta forma parti di “un konflikto mas grandi ku ya ta dura 75 aña” i di kua e solushon, na su opinion, ta “rekonosimentu di un estado palestino”.
