AMSTERDAM (AFP).- E alkalde di Amsterdam, Charlotte van Ouwerkerk, ta konsiderá ku regulashon di uso di droga pisá manera kokaina i ‘ecstasy’ lo ta e úniko manera pa bringa narkotráfiko i su efektonan desastroso serka hubentut dje kapital hulandes.
“Laga nos imaginá ku por haña kokaina den botikanan òf mediante e sistema médiko”, segun e alkalde den un entrevista ku AFP.
E dirigente ekologista, di 57 aña, for di 2018 ta na kabes dje siudat mundialmente konosí pa su komersio dinámiko i turístiko i pa su coffeeshops, kaminda tin benta i uso di mariwana.
Pero asina mes, narkotráfiko ta sigui move míles di miónes di euro kada aña i ta un menasa pa hóbennan vulnerabel.
“Mi ta kere ku algun droga ta peligroso i ta bon si redusí e konsumo. “Pero e manera ku nos ta hasiendo e kosnan awor aki no ta yuda, p’esei mester reflekshoná i bin ku mihó manera pa regulá e droganan”, el a agregá.
Den Amsterdam, plataforma importante di tráfiko di droga, e 80% di aktividatnan polisial ta konsentrá riba kombatí e kriminalidat relashoná ku tráfiko di droga, el a splika.
E impakto di narkotráfiko ta desastroso pa e hubentut di Amsterdam, kaminda e uso di droganan pisá ta plama rápidamente, meskos ku t’e kaso den otro kapitalnan europeo, segun el a sigui bisa. Apesar di e medidanan polisial, “e preis di kokaina den kaya no a varia i komo tal represhon no a surti efekto grandi”, segun el a atmití.
“Pues no ta ridíkulo ku nos ta laga e tráfiko di droga den man di kriminalnan en bes di buska pa haña un sistema di merkado sivilisá?”, segun Femke Halsema a puntra.
E posishon aki ta fuertemente kritiká, spesialmente di parti dje alkalde di Antwerp Bart de Wever, “gran partidario di e guera kontra di droga”, Halsema ta bisa.
E siudat portuario belga e último añanan a bira e prinsipal haf di entrada di kokaina den Europa.
Outoridatnan di otro punto importante di tráfiko, Rotterdam, ta ataká otro aspekto dje kadena i aña pasá a lansa un kampaña ku tin komo meta pa e yega serka e usadónan, despues di indiká ku kada uso di droga ta un apoyo na retnan kriminal.
