BOGOTA (AFP).- E komandante prinsipal dje grupo di esnan ku a bira lomba pa FARC, alias Ivan Mordisco, a bandoná e negoshashon di pas den Colombia, segun gobièrnu ku lo sigui dialogá ku e otro lidernan gueriero.
Mordisco, na mando dje outo denominá Estado Mayor Central (EMC), “no ta na mesa i nos no sa unda e ta”, segun Camil Gonzalez, hefe di e delegashon ofisial den e negosiashonnan ku a start na kabamentu di 2023.
Segun gobièrnu, e grupo aki ta dividí, i komo tal lo negoshá ku e otro kabesantenan. Gonzalez a referí na Andrey komo e hòmber fuerte nobo dje guerieronan, ya ku supuestamente e tin outoridat riba 50% di e 3.500 kombatientenan di EMC.
Ku kabei largu i semper dòrná ku prendanan luhoso, Andrey tabata e bosero dje grupo disidente. Pero su alkanse di poder nan ta bon kla.
Segun ekspertonan, Mordisco tabata liderá e organisashon EMC ku man duru. EMC ta kontrolá rutanan mionario di narkotráfiko i mineria ilegal, prinsipalmente den Amazon.
Famoso pa su abilidat pa manehá asuntunan di arma, e komandante a pertenesé na e grupo gueria FARC ku ya no tei mas, pero nunka ker a aseptá e akuerdo di pas di 2016 i a sigui den aktividatnan klandestino.
E diálogo a kuminsá dia 17 di mart, ora ku e presidente Gustavo Pedro a deklará final di periodo di pas bilateral den tres departamento den zùitwèst dje pais despues di asesinato di un lider indígeno di parti di rebeldenan.
E mandatario a rabia pa motibu dje atakenan konstante di EMC riba e pueblonan dje departamento di Cauca i e reklutamentu fòrsá di menornan di edat.
