TIJUANA, MEXICO, AP.- E alkalde di Tijuana a deklará un krísis humanitario den e siudat na frontera ku Merka. E alkalde a pidi sosten di Nashon Uní pa okupá di e 5.000 migrantenan sentroamerikano ku a yega den e siudat.
Alkalde Juan Manuel Gastelum a sigurá ku e gobièrnu federal mehikano no a duna sufisiente sosten i ku e lo no komprometé servisionan públiko di e siudat pa lidia ku e situashon. El a agregá ku 4.976 migrante a yega den e siudat.
“Nos no tin sufisiente infrastruktura pa atendé ku e personanan aki i duna nan un espasio digno”, asina Gastelum a bisa djabièrnè na e radio Grupo Formula.
Djaweps, su gobièrnu a emití un komunikado bisando ku a pidi yudansa di Ofisina di Nashon Uní pa Koordinashon di Asuntunan Humanitario.
“Mi no ta bai gasta e plaka di Tijuana”, asina Gastelum a bisa den e komunikado.
E karavana di migrante ku a sali di Honduras meimei di òktober a wòrdu bon risibí den siudat i pueblonan mehikano ku a krusa e paisnan pa yega frontera i drenta Merka. Asta siudatnan ku masha poko rekurso a sigurá ku e migrantenan a haña kuminda i un sitio pa deskansá.
