SEATTLE, AP.- Amazon ta apoyá e demanda ku fiskalia di estado di Washington a kuminsá kuné kontra di e òrdu di presidente Donald Trump di prohibí entrada na e pais di siudadanonan di sierto pais musulman, asina e direktor general i fundadó di e empresa Jeff Bezos a bisa.
Microsoft i Expedia tambe a duna sosten na e demanda, ku a keda presentá djaluna den korte federal di Seattle.
“Nos ta un nashon di imigrante di diferente antesedente, idea i puntonan di bista ku a yuda nos na konstruí i inventá komo nashon pa mas di 240 aña”, asina Bezos a bisa den un mensahe elektróniko interno na empleadonan di Amazon.
“Niun nashon ta mihó na momentu di probechá e energia i talentonan di imigrantenan. Ta un bentana kompetitivo signifikativo pa nos pais, un bentaha ku nos no mester debilitá”.
Bezos a primintí na apoyá tur e empleadonan di Amazon na Merka i na mundu kompleto ku ta keda afektá pa e òrdu aki.
Abogadonan di e empresa a prepará un deklarashon di apoyo na e demanda, asina Bezos a skibi den su mensahe via e-mail.
E demanda ta denunsiá ku e restrikshonnan na e entrada di siudadanonan di shete pais mayoria musulman ta perhudikando e ekonomia di e estado di Washington i su kompanianan.