CARACAS, AP.- Presidente venezolano Nicolás Maduro a huramentá ayera un direktiva di petroli estatal nobo komo parti di un restrukturashon ku ta buska na rekuperá e produktividat i stòp korupshon di e empresa.
Eulogio Del Pino e presidente aktual di Petroleos de Venezuela SA a keda ratifiká den e puesto ei pero no mayoria di e ehekutivonan antiguo. Entre e funshonarionan nobo ta resaltá poko eksperensia den e industria petrolero, vários di nan ku ta bin di e sektor polítiko òf militar.
E huramentashon a sosodé kasi un luna despues ku Del Pino kende ta fungi komo minister di petroli a keda remplasá den su kartera pa Nelson Martinez otro presidente di Citgo filial di PDVSA na Merka.
Maduro a afirmá ku e kambio tabatin komo propósito ku Del Pino ta konsentrá solamente den direkshon di e korporashon.
Pa Maduro, e kambionan di PDVSA lo profundisá e restrukturashon pa kura heridanan ekonómiko, moral, sosial i polítiko ku segun e mandatario a laga un guera ekonómiko.
E gobièrnu ta bisa ku e krísis ekonómiko, polítiko i sosial ku e venezolanonan ta pasando aden ta konsekuensia di un guera ekonómiko promové pa e sektornan opositor i empresarial, pero analistanan ta bisa ku e situashon kompliká ta produkto, parsialmente di e falta di e sistemanan di kontrol di preis i di kambionan vigente for di 2003.
PDVSA no a skapa di e krísis ku a bira pió for di momentu ku e preisnan di petroli a baha, kual a representá 96% di e entradanan di eksportashon.
