LONDON, AP.- E minister britániko enkargá ku e salida di Union Oropeo a pidi legisladónan pa no blòkia e inisio di e negosiashonnan di separashon, bisando ku e pais a pasa e punto ku no por drei bèk, den e desishon di sali.
E kámara di komun a realisá dos dia di debate riba un proposishon di lei ku ta outorisá e promé minister Theresa May pa aktivá e proseso di dos aña di negoshashon di Brexit, na momentu ku e gobièrnu a preshoná pa kumpli ku un plaso dia 31 di mart pa kuminsá e proseso.
E gobièrnu a hañ’é forsá na introdusí un proposishon pasobra un sentensia di Korte supremo siman pasá a frustra e gestionnan di May pa kuminsá e proseso sin nesesidat di un aprobashon parlamentario.
Inisiando un debate, e sekretario di Brexit David Davis a bisa ku e legisladónan tin di kontestá un pregunta masha simpel “nos ta konfia òf no den pueblo?”.
“No ta trata di un lei si reino uni mester laga e union ni riba kon mester hasié”, asina el a bisa. “Ta trata simplemente di parlamento dunando e poder na gobièrnu pa implementá un desishon ku ya a keda tuma; un punto ku no por drei bèk, ya a pas’é”.
Si e legisladónan yega na un akuerdo awe, e medida lo keda saminá mas ekstenso pa un pènel i lo sigui pa e kámara mas haltu.
E partido laborista, e grupo prinsipal di oposishon a bisa ku e lo trata na adaptá e lei pero no bloke. E bosero di e laborismo pa Brexit Keir Starmer a bisa ku “komo demókratanan nos partido tin ku aseptá e resultado”, di e referendum.
Si e resultado lo tabata na fabor di keda, nos lo a spera ku esei tambe lo a keda respetá, asina el a bisa. Pero algun legisladó laborista ku ta representá áreanan di e pais ku a vota na fabor di keda den union oropeo a bisa ku nan lo respetá e deseonan di nan konstituyentenan i vota kontra lansamentu di e proseso.
