MERKA, AP.- Apple a reorganisá su supsidiarionan den ekstranheria pa saka probecho di e leinan fiskal nobo den e isla oropeo chikí di Jersey, despues ku a imponé medidanan mas estrikto na Irlanda for di 2013, di akuerdo ku un reportahe di The New York Times i e konsorsio internashonal di periodistanan di investigashon.
E publikashon i e organisashon di investigashon sin fin di ganashi a sita e registronan konfidensial ku nan a haña i kompartí esakinan ku e korant aleman Suddeutsche Zeitung.
E movementunan a keda hasi despues di un supkomishon di senado a haña na 2013 ku Apple a evitá e pago di míles di mion dòler na impuesto ora el a usa e paraisonan fiskal. E korant a bisa ku Apple tin 128 mil mion dòler na ganashi ku ta bin di ekstranheria i ku no a keda deklará na Merka.
Apple a trasladá su direkshon fiskal di e dos supsidiarionan di Irlanda pa Jersey, un isla outónomo ku ta keda den kanal di Mancha entre Gran Bretaña i Fransia. Apple no a duna komentario riba e publikashonnan.
