BUENOS AIRES, AP.- A haña morto den su apartamentu na Buenos Aires, Ines Zorreguieta, e ruman mas hóben di reina Maxima di Ulanda.
Su mama i un amiga a deskubrié, dunando indikashon ku por ta trata di un kaso suisidio.
Trudi Hulscher, di Departamento di Komunikashon di Kas Real Ulandes, a bisa djaweps na The Associated Press ku e ruman di Maxima di Ulanda, “posiblemente” a kita su propio bida i ku debí na esaki mester a hasi kambionan na agènda di e reina.
Fiskal Nashonal, na kargo di e investigashon di morto di Zorreguieta, di 33 aña, a señalá den un komunikado ku Maria del Carmen Cerruti, mama di Ines, i un amiga di esaki, a haña e kurpa sin bida djárason anochi, despues di drenta huntu den e apartamentu kaminda e hóben tabata biba. No por a komuniká ku Ines durante henter dia.
“Segun e kier a drenta den kamber di Ines, e amiga a atvertí ku nan no por habri e porta, pero usando forsa a logra esaki i a haña su amiga morto. Nan a yama 911 mesora”, asina e komunikado a indiká, agregando ku e “mama di Zorreguieta mester a wòrdu kontené pa personal di asistensia sikológiko”.
E kansier argentino Jorge Faurie a lamentá e echo den deklarashon na periodistanan i a indiká ku e gobièrnu a pone na disposishon di Maxima di Ulanda “pa fasilitá” e posibel yegada di e reina i otro miembronan di e famia real den e kapital “pa partisipá den e despedida di su ruman”.
