CARACAS, AP.- 27 militar a wòrdu detené djaluna despues di un rebelion ku a wòrdu registrá den un instalashon di Guardia Nashonal, na nort di e kapital di Venezuela.
E presidente ofisialista di Asamblea Nashonal Konstituyente, Diosado Cabello, a indiká ku a arestá 25 militar na e sitio di rebelion. Dos mas a wòrdu arestá na un sitio deskonosí.
Cabello a bisa den un konferensia di prensa ku e detenshonnan por kontinuá.
Sargento di Gaurdia Nashonal, Alexander Bandres Figueroa a wòrdu identifiká komo hefe di e grupo rebelde. E visepresidente di e partido ofisialista a indiká ku e operashon “tabata unu kompletamente limpi” kaminda forsanan di seguridat a logra kontrolá akshon sin pèrdida di bida humano den un temporada relativamente kòrtiku.
E dirigente ofisialista a bisa ku e akshon di e militarnan rebelde su intenshon tabata pa krea “intrankilidat” entre e venezolanonan, pero a agregá ku nan no a logra nan ophetivonan.
