WASHINGTON, USA (AFP).- E ehekushon mediante inyekshon di un asesino kende a mata diferente persona i ku tabata programá pa tuma lugá den e estado di Idaho, a keda suspendé ayera despues ku un ekipo médiko no por a atministrá e dósis mortal den e tempu determiná, segun a keda informá pa funshonarionan dje prizòn.
Thomas Creech, di 73 aña, mester a keda ehekutá ayera mainta 10’or, pero kumplimentu dje pena kapital a keda kanselá un ora mas lat, segun e prizòn ta bisa den un nota.
Direktor dje prizòn IDOC, Josh Tewalt, a skirbi ku “despues di konsultá ku e hefe di prizònnan, a determiná ku e ekipo médiko no por a haña ardu dje konvikto pa hinka e angua, loke a trese kuné ku e ehekushon no por a tuma lugá. “Komo resultado di esaki, e sentensia di morto a ekspirá”, segun el a agregá. A hiba Creech bèk pa su sèl.
“Estado di Idaho lo konsiderá e siguiente pasonan”, el a agregá.
E último ehekushon ku a faya na Merka tabata dje asesino konvikto Kenneth Smith na Alabama den novèmber di 2022, tambe mediante inyekshon. Smith finalmente a keda ehekutá den yanüari dje aña’ki den e promé ehekushon den e pais realisá ku gas nitrógeno.
