MOGADISCIO, AP.- Un grupo di ekstremista islámiko a eksplotá e trali di akseso di un hotèl na Somalia ku un outo bòm i a okupá e edifisio durante mas di 14 ora siman pasa djabièrnè. E atake a laga 26 morto, entre otro un periodista kanades-somalí.
Entre e mortonan tin tres keniano, tres tanzanio, dos merikano i un britániko, segun informashon di Ahmed Madobe, gobernador di Jubbaland. 56 persona, entre nan dos chines, a resultá herida den e atentado, segun indikashon di e funshonario na periodistanan.
Por lo ménos kuater militante di e grupo al-Shabab a drenta den Hotèl Asasey djabièrnè anochi, kuminsando ku un outo bòm ku a eksplotá na e trali di akseso. Seguidamente, e agresornan a drenta den e edifisio di e hotèl, kual ta wòrdu bishita pa miembronan polítiko, empresarionan i tambe dignatarionan.
Mas di 14 ora a pasa promé ku polis a logra mata e atakantenan den instalashon di e hotèl. Un grupo islamita rebelde na Somalia a atribuí e atake.
E atentado ta un gòlpi fuerte pa esfuersonan di e gobièrnu somalí pa realisá elekshon na nivel nashonal otro aña.
