WILLEMSTAD.- Tres persona a muri djaweps den un atake den un iglesia den kurason di Nice, na sùitost di Fransia. Presidente Emmanuel Macron a bisa ku esaki ta “un atake terorista islamita” den e pais ku ya ta den alerta máksimo.
Un otro atake den e siudat franses Yeda a laga un bewaker di konsulado heridá i outoridat a detené un afgano na Lyon pa motibu ku el a purba drenta trein ku kuchú. Tur e insidentenan aki a sosodé riba e mesun dia.
E atakante di Nice ta un migrante tunesino di 21 aña ku a yega Fransia na komienso di luna despues di a pasa via e isla italiano Lampedusa. El a drenta den e basílika di Notre-Dame na Nice 9 or di mainta i a grita “Allahu Akbar” vários biaha. El a keda heridá den un intervenshon polisial i ta hospitalisá aktualmente.
El a asesiná dos víktima den e basílika. Ta trata di un muhé di edat avansá i un laiko di 45 aña. E terser víktima tabata un muhé di kuarenta aña ku a logra hui gravemente heridá i muri un ratu despues.
E gobièrnu a subi e nivel di seguridat den e pais kompleto kual ta korespondé na un estado ku máksimo vigilansia. Outoridat a oumentá e kantidat di efektivo militar ku ta patruya riba kaya di 3.000 pa 7.000.
