HOUSTON, AP.- E áwaseru ku tormento Harvey a laga na Cedar Bayou, Texas, a yega 132 centimeter di awa. Esaki ta representá un record tantu pa Texas komo pa e estadonan di Merka. Esaki no a superá e 133 centimeter di awa ku siklon Hiki a laga na Kauai, Hawai, na aña 1950, promé ku Hawai a kombertí den estado.
Harvey a rekuperá un tiki forsa djamars pero ainda ta un tormenta tropikal. Su bientunan máksimo sostené a pasa di 72 kilometer pa ora pa 80 kilometer pa ora.
Meteorologonan a bisa ku a áwaseru lo sigui asotá sùitost di Texas i sur di Louisiana.
HOUSTON TA HABRI MAS REFUGIO PA FAMIANAN AFEKTA
E gobernador di Louisiana a ofresé pa risibí texanonan damnifiká pa Harvey, miéntras ku outoridat di Houstin tin plania di habri dos òf tres refugio adishonal pa duna e víktimanan di Harvey aki un kaminda pa keda.
E sentro di konvenshon na Houston ya a haña mas di 9.000 persona, kasi dòbel di loke outoridat a premirá originalmente na e sitio, segun alkalde Sylvester Turner.
“Nos no ta bai rechasá niun hende. Pero esaki ta nifiká ku nos lo mester ekspandé nos funshonnan i nos kapasidat”, asina Turner a bisa. “Yudansa ta na kaminda”.
PROPOSISHON PA PRIZONERONAN LIMPIA DAÑONAN DI HARVEY
Un hefe polisial di Massachusetts a proponé pa manda prizoneronan prizòn di un kondado pa yuda presidente Donald Trump konstruí un muraya na frontera ku México, ta ofresiendo pa manda prizoneronan Texas pa asina yuda ku limpiesa di e dañonan ku orkan Harvey laga atras.
E kanal di radio WGBH-FM a reportá ku Thomas Hodgson, hefe di polis di kondado Bristol, ta deseá di manda prezunan “boluntario” pa yuda ku rekonstrukshon di Houston.
Dies prezu a ekspresá nan interes den e proyekto, segun señalashon di Hodgson. E ta spera ku e kostonan di transportashon i alohamentu ta wòrdu kubri ku fondonan federal destiná pa atenshon di desaster.
E plan mester wòrdu aprobá pa Agensia Federal pa Maneho di Emergensia, hefenan di polis lokal ku ta involukrá i e Asosiashon Nashonal di Hefe di Polis.
