WASHINGTON, MERKA, AFP.- Presidente Joe Biden a sigurá djamars ku Merka lo tin sufisiente vakuna kontra COVID-19 pa tur adulto merikano promé ku fin di mei.
“Nos tin sufisiente vakuna disponibel pa tur adulto den Merka desde awe te ku fin di mei”, asina Biden a deklará, kende a anunsiá tres siman pasá ku lo kumpli ku e meta pa promé ku fin di yüli.
“Esaki ta un avanse importante”, asina el a bisa agregando ku esaki no ta nifiká ku tur adulto merikano ta keda vakuná pa e fecha. “Nos tin sufisiente vakuna, pero mester di hende pa inyektá esnan ku ta haña e vakuna tambe”.
E presidente a hasi e anunsio durante un diskurso kòrtiku kaminda el a konfirmá un akuerdo entre e kompanianan Merck i Johnson & Johnson pa oumentá produkshon di e vakuna kontra COVID.
Biden a anunsiá ku sentronan di produkshon di e vakunanan di Johnson & Johnson lo funshoná 24 ora pa dia, shete dia pa siman desde awe.
E vakuna a haña outorisashon di uso di emergensia siman pasá den Merka pa tur esnan riba 18 aña. E vakuna tin dos bentaha grandi kompará ku e otronan: e ta rekerí solamente un dósis i por warda esaki den temperatura normal.