ANGUILA
Outoridat a informá di un persona morto riba teritorio britániko di Anguila, kual su hospital, sentronan di refugio i aeropuerto a sufri dañonan fuerte. 90% di kaminda no por wòrdu transitá ariba, segun Agensia di Maneho di Emergensia pa Desaster di Karibe (CDEMA). Reino Uni a bisa ku Irma a kousa dañonan “severo” i “kritiko” den algun parti di e teritorio.
ANTIGUA I BARBUDA
Un mucha di 2 aña a fayesé na Barbuda na momentu ku su famia a purba skapa di un kas. Mas o ménos 60% di e kasi 1.400 abitantenan di e isla a pèrdè nan kas debí na e tormenta.
E promé minister di Antigua i Barbuda, Gaston Browne a bisa ku e rekuperashon por tarda vários luna, òf asta aña. E abitantenan di e isla tabata pendiente di un otro orkan, Jose. Fin di siman esaki por yega nortost di Karibe.
ISLANAN VIRGEN BRITANIKO
Diferente kas i edifisio komersial a haña dañonan fuerte, segun CDEMA.
E empresario multimionario Richard Branson, ku a pasa e tempestat riba su kas riba isla priva Necker, a bisa ku tur e kasnan a pèrdè i e zona a keda “totalmente i apsolutamente destrosá”.
PUERTO RICO
Mas o ménos un mion persona a keda sin elektrisidat despues ku Irma a pasa na nort di e isla. Kasi 500.000 persona no tabatin suministro di awa limpi djaweps.
SINT MAARTEN
Morto di sinku persona a keda konfirmá riba isla di Sint Maarten. Kuater a muri den e parti franses i un den e parti ulandes. E promé minister franses Edouard Philippe a bisa ku mas o ménos 50 persona a resultá leshoná. Outoridat a bisa ku e sifra di víktima por subi paso ekiponan di reskate ainda no tin e konteo di daño total.
E minister di Asuntunan Interior di Ulanda, Ronald Plasterk a bisa ku a registrá vários sakeo i Ulanda a manda 50 polis adishonal desde Kòrsou.
