BRASILIA, BRASIL, AFP.- Sentenáres di simpatisadó di e eks presidente derechista Jair Bolsonaro a invadí Kongreso, Tribunal Supremo i palasio presidensial di Planaltona Brasília, rechasando inougurashon di e presidente iskierdista Luiz Inacio Lula da Silva.
Un ola di manifestante bistí na hel i bèrdè di e bandera nashonal a invadí e sede di Poder Ehekutivo, Legislativo i Hudisial den e kapital Brasileño, segun indikashon di AFP. E invashon ta similar na e okupashon di Capitol, e sede di Kongreso merikano na Washington na aña 2021.
E manifestantenan a protesta kontra regreso na poder di Luiz Inacio Lula da Silva, kende a derotá Bolsonaro den e di dos buèlta di 30 di òktober i a keda inougurá komo presidente di Brasil pa di tres biaha. Anteriormente el a goberná entre 2003 i 2010.
Outoridatnan a sera e área alrededor di e edifisio legislativo na Brasília. Sinembargo, sentenáres di partidario di Bolsonaro ku a ninga di aseptá e viktoria elektoral di Lula a logra subi riba dal di e edifisio segun indikashon di un reportero di AFP.
E imágennan impaktante publiká pa medionan i retnan sosial a rekordá mundu riba e invashon di Capitol di Merka riba 6 di yanüari 2021 na Washington, di parti di partidarionan di èks presidente Donald Trump, un aliado di Bolsonaro, pa impedí sertifikashon di e demókrata Joe Biden kende a gana den elekshon di 2020.
