ANKARA, TURKIA, AP.- Un boto transportando migrantenan pa Gresia a senk dilanti di kostanan turko, provokando morto di por lo ménos 12 migrante, segun informashon di Warda Kosta di Turkia.
31 migrante a wòrdu reskatá despues ku nan boto a senk den laman Egeo serka di Bodrum, segun wardakosta. E region ta serka di e isla griego di Kos.
E komunikado ofisial di e servisio a revelá ku e 12 kadavernan aki tabata den restu di e boto, 32 meter bou di awa.
Dos boto di wardakosta, un helikòpter i un ekipo di sambuyadó a partisipá den e operashon di búskeda i reskate.
No ta evidente kiko a provoká e insidente. No tabatin informashon tokante nashonalidat di e migrantenan disponibel.
Ounke e kantidat di personanan ku ta sali rumbo pa e islanan griego a baha for di inisio di e krísis di refugiado na aña 2015, diferente persona ta kontinuá ku e travesia peligroso aki tur siman di nobo.
E servisio marítimo di reskate na Spaña a informá ku a reskatá 292 migrante ku a purba krusa laman Mediteráneo rumbo pa Europa for di Nort di Afrika.
