NAIROBI, AP.- Kenia ta liber di ébola despues ku resultadonan di análisis a mustra ku un dama no a wòrdu infektá ku e vírus mortal. E nashonnan bisiña, Congo i Uganda ta kombatiendo e brote di e enfermedat aki.
E minister di Salú di Kenya, Sicily Kaiuki, a anunsiá ku e pashènt, aisla den e Hospital di Kondado di Kericho, no tin e vírus di ébola.
E dama a mustra algun síntoma di ébola despues ku el a biaha pa Malaba, kual ta keda na frontera entre Kenia i Uganda, kual a kousa temor ku e brote aktual na Congo a plama den Kenia tambe. Mas di 1.400 persona mas a fayesé for di ougùstùs na ost di Congo dor di e enfermedat aki, i siman pasá Uganda a registrá su promé kasonan kaminda dos persona a muri.
E ministerio di salú di Kenia a garantisá ku a tuma tur medida apropiá pa evitá e propagashon di ébola.
“A implementá medidanan preventivo, inkluyendo aislamentu di pashèntnan”, segun indikashon di Kariuku durante un rekorido den e aeropuerto internashonal di Nairobi pa opservá kon ta revisá e pasaheronan pa determiná síntomanan di e keintura aki.
E dos víktimanan na Uganda tabata pertenesé na un famia kongoles, i posiblemente a wòrdu infektá durante un entiero na Congo, kaminda diferente persona a asistí.
Un komishon di eksperto di e Organisashon Mundial di Salú a bisa djabièrnè ku e brote di ébola na Congo ta “un evento ekstraordinario” di sumo preokupashon, pero ku ainda e no meresé pa wòrdu deklará komo un emergensia global.
