BRASILIA, BRAZIL, AFP.- Outoridatnan brasilero a liberá sentenáres di persona detené den e asalto di edifisionan di gobièrnu, i presidente Luiz Inacio Lula da Silva a primintí ku e lo rekuperá e pais despues di e “aktonan di terorismo”.
Polis a arestá mas ku 1.500 persona despues ku partidarionan di èks presidente derechista Jair Bolsonaro a invadí e sede di gobièrnu na Brasília djadumingu.
Nan ta ninga di aseptá e derota elektoral di Bolsonaro kontra Lula den òktober.
Pero polis federal a bisa den un komunikado djamars ku “599 persona a keda liberá, den su mayoria ansianonan, personanan ku problema di salú i esnan sin kas i tambe mamanan ku yu” pa motibunan humanitario.
Mayoria di e arestonan a tuma lugá djaluna na momentu ku polis a disolvé kampamentunan di protestanan den e kapital.
Lula a kritiká e aktonan terorista i vandalismo kriminal i golpista na momentu ku el a yega e palasio presidensial sakiá djaluna.
E minister di Hustisia, Flavio Dino a bisa ku a emití 50 òrdu di aresto pa personanan ku no a keda detené durante e sakeo i otronan ku no tabata presente pero akusá ku organisá e atake.
