RIO DE JANEIRO, AP.- Polis brasilero a kaptura un di e asaltantenan ku a hòrta 718 kilo di oro for di un terminal di karga di aeropuerto internashonal di Sao Paulo. E oro aki ta balorá na 30 mion dòler.
Delegadonan di e Komisario spesialisá den robo di banko a konfirmá e detenshon di un di e personanan involukrá den e asalto, pero polis no a publiká identidat di e sospechoso. No ta evidente kiko tabata su ròl den e grupo kriminal aki, kual posiblemente ta konsistí di ménos di dies persona.
“E prosedimentu kier preservá e investigashon i evitá kualkier desafio”, segun indikashon di polis. Te ainda outoridat no a lokalisá e oro.
E ladronnan a drenta den e terminal di karga di aeropuerto Guarulhos disfrasá na polis i a bai ku e oro. Nan a skapa ku e oro den ménos ku tres minüt, sin efektuá ningun tiru. Esaki ta e asalto mas grandi den historia resien di Brasil.
Polis a pone énfasis riba profeshonalismo di e grupo i ta investigá si esaki ta relashoná ku un otro atrako sofistiká na aña 2018 kontra aeropuerto Viracopos, Sao Paulo. Akinan e ladronnan a logra bai ku sinku mion dòler.
