HONG KONG, AP.- Polis a tira gas lakrimógeno kontra manifestantenan djadumingu, durante e di dos anochi konsekutivo di un eskala nobo di protesta na fabor di demokrasia. E protestanan ta tumando lugá ya pa vários siman kaba riba e teritorio chines semi outónomo.
E manifestantenan a okupá dos área den sentro di Hong Kong, despues di un manifestashon kontra uso di gas lakrimogeno di parti di polis un dia promé.
Un grupo a blòkia un karetera serka di un ofisina di gobièrnu chines. Polis a atvertí e manifestantenan pa hala atras pero nan a rospondé tirando e agentenan ku webu. E ofisialnan a tira ku gas lakrimógeno pa stòp avanse di e manifestantenan. Esaki tabata e segundo dia konsekutivo kaminda e manifestantenan a sali riba kaya sin pèrmit ofisial pa hasi esaki.
Hong Kong a keda afektá pa shete siman di protesta. E oposishon kontra un proyekto di lei di ekstradishon a kousa e demandanan. E pueblo ta pidi renunsia di e lider di e siudat tambe i un investigashon kontra agentenan polisial pa determiná si nan a usa forsa eksesivo pa reprimí e protesta aki.