BRASIL,AP.- Un brote di Gele Koorst na Brasil a afektá mas persona ku e brote anterior, ku ta esun di mas grandi den dékadanan.
E minister di salubridat a bisa ayera ku a konfirmá kaba 846 kaso di e malesa aki transmití pa sangura. Di esakinan, 260 kaso tabata mortal.
Den e brote na 2016-2017 den e pais mas grandi di Latinoamérika tabatin 777 kaso i 261 fatal.
Areanan grandi di Brasil a keda eksponé na gele koorst pa hopi tempu kaba. Pero e brote aki meskos ku esun último ta sosodiendo den zonanan ku ántes no tabata konsiderá riesgoso pa e enfermedat i kaminda e índise di vakunashon ta hopi abou.
E brote aktual ta afektando fuertemente e zona asina popular di Sao Paolo i Minas Gerais i a invadí tambe siudatnan grandi. Brasil na su turno a kuminsá ku un kampaña grandi pa vakuna mas di 23 mion di persona.