SACRAMENTO, CALIFORNIA, MERKA, AP.- Gobernador di California Jerry Brown i legisladornan prominente a anunsiá djamars ku nan tin plania di invertí 30 mion den servisio legal i yudansa finansiero universitario pa hóbennan inmigrante.
E anunsio tabata un kontesta na desishon di presidente Donald Trump pa desmantelá un programa ku ta suspendé proseso di deportashon i otorgá pèrmit di trabou na algun hóben inmigrante ku a wòrdu trese den Merka di forma ilegal durante infansia.
E proposishon ta rekerí aprobashon di legislatura e siman aki, promé ku legisladornan deskansá pa sobra di aña.
20 mion lo bai pa servisio legal pa benefisiarionan di DACA. E sobra 10 mion lo wòrdu usa pa yudansa finansiero pa universitarionan ku ta den e programa; 7 mion pa studiantenan di universidatnan komunitario, 2 mion pa studiantenan di sistema di Universidat Estatal di California i un mion pa studiantenan di sistema di Universidat di California.
E gobièrnu di Trump a bisa ku DACA ta bai wòrdu desmantelá den próksimo seis lunanan si Kongreso no hasi e inisiativa permanente.
California, kaminda 200.000 di e 800.000 benefisiairionan di DACA ta biba, ta un di e 19 estadonan ku a demandá gobièrnu di Trump pa desishon di kanselá e programa.
