REDDING, CALIFORNIA, AP.- Míles di persona a evakuá nan kasnan despues ku algun kandela di mondi a menasá un lokalidat na nort di California, miéntras ku e siniestro mas grandi i mortal di e estado a ekspandé levemente, segun indikashon di outoridat.
Un total di mas di 10.000 persona a haña òrdu di evakuashon debí na e kandelanan den kondado di Mendocino i Lake, dos di e 17 siniestronan ku ta kimando den e estado kompleto. E bomberonan i personal ku ta kombatí e kandelanan aki ta den su kapasidat máksimo.
Un hòmber, kende su kasá i dos nietu tabata algun di e seis mortonan den e Kandela Carr, serka di Redding, a bisa djasabra ku e no a haña ningun òrdu di evakuashon.
Ed Bledsoe a bisa na CBS News ku e no tabata sa ku su kas tabata na peliger djaweps, na momentu ku el a sali pa hasi un fabor na su kasá Melody. E tin dos yu, un di 4 i sinku aña tambe.
Bledsoe a bisa ku su kasá a yam’é 15 minüt despues pa pidié pa regresá kas debí ku e kandela tabata aserkando. El a bisa ku un di su yunan a bisé ku e kandela tabata den porta patras di kas. Na momentu ku el a purba regresá, e kaminda tabata blòkiá ku outo i e kandelanan no a lag’é yega kas na pia.
E shèrif di e kondado di Shasta Tom Bosenko a bisa ku e kadena di televishon ta investigando si famia Bledsoe a wòrdu notifiká ku un yamada di atvertensia òf si nan a presentá personalmente na e famia su kas. E shèrif a bisa ku no tin evidensia ku e famia a wòrdu notifiká personalmente den e zona.
E último evakuashonnan ta inkluí 1.000 persona den kondado di Mendocino, segun indikashon di Matthew Kendall, sup shèrif di e kondado di Mendocino.
