SANTA ROSA, CALIFORNIA, MERKA, AP.- Lo dura algun luna i probablemente aña, pa nort di California rekuperá di kandelanan devastador ku a asotá e region na komienso di luna. E kandela a mata 42 persona i a destruí por lo ménos 8.900 struktura, segun indikashon di funshonarionan djasabra.
“Nos no por kontrolá e susesonan aki i esei ta mustra kon chikitu mundu ta ora tipo di kosnan asin’aki pasa”, asina e hefe di polis, Rob Giordano a bisa, kende a papia dilanti di sentenar di personanan kongregá den un sentro universitario na Santa Rosa, un di e siudatnan mas afektá, pa un homenahe na esnan ku a fayesé.
E kandelanan mas mortal den historia di California a kuminsá dia 8 di òktober i a obligá 100.000 persona pa sali di nan kas.
E lider di minoria di Kámara di Representante di Merka, e demókrata Nancy Pelosi, i sinku miembro di Kongreso a asistí na e akto, nan a bishitá zonanan dañá pa e kandela i a skucha funshonarionan federal, estatal i lokal ku a deskribí kiko Kongreso por hasi pa yuda e rekuperashon di e region.
