OTTAWA, CANADA, AFP.- Polis di Canada a bisa ku a detené 11 manifestante ku tabatin arma i munishon skondí na frontera ku Coutts na Alberta kaminda nan tabata for di un siman pasá den protesta kontra e medidanan di covid.
Un total di 13 arma largu, pistol, vários konhunto di chaleko antibala i un gran kantidat di munishon a keda hañá den tres trùk, segun e komunikado di polis ta bisa.
A kuminsá un investigashon pa determiná e alkanse di menasa i e organisashon kriminal. “Awor ku e elementonan mas peligroso a keda arestá, nos por apliká e lei ku mas rigor na Coutts:, asina promé minister di Alberta Jason Kenney a bisa na periodistanan, poko despues di e anunsio di forsanan di orden.
Polis a bisa ku nan a risibí informashon di un grupo instalá na frontera i ku tabata kla pa usa forsa kontra polis si nan traha na kibra e blokeo.
