SANTIAGO DE CHILE, AP.- Canada a pone mas sanshon kontra e gobièrnu di presidente venezolano Nicolás Maduro, kual ta atribuí na deterioro di e situashon polítiko i ekonómiko den e pais suramerikano.
E minister di Relashon Eksterior, Chrystia Freeland, a anunsiá e sanshonnan kontra 43 funshonario venezolano, entre nan e gobernadornan regional. Canada a sanshoná 70 persona kaba, vinkulá ku Maduro su gobièrnu.
E sanshonnan ta inkluí kongelashon di aktivá i prohibishon di e kanadesnan pa realisá kualkier transakshon finansiero ku personanan spesífiko.
Maduro a ignorá diferente deklarashon di e grupo di 14 pais, Grupo di Lima i otro nashonnan pa solushoná e krísis humanitario, polítiko i ekonómiko ku ta afektando e nashon suramerikano.
Merka tambe a sanshoná Venezuela, poniendo sanshonnan ekonómiko kontra empresanan venezolano riba suela merikano i personanan yegá di Maduro. E último sanshon di siman pasá a afektá un empresa venezolano estatal, kual ta dediká na buska mineral.
Grupo di Lima a surgi na aña 2017 pa atendé ku e situashon venezolano di forma pasífiko.