TORONTO, AP.- Canada a anunsiá djárason ku e pais ta retirá mitar di su personal kanades for di su embahada na Cuba despues ku un diplomátiko mas a bira malu di forma misterioso.
Canada a konfirmá 14 kaso di problema misterioso ku salú desde komienso di aña 2017. Bintiseis empleado di e embahada di Merka na Cuba a wòrdu afektá meskos. Nan tabatin diferente síntoma i un diagnóstiko a inkluí leshon serebral troumátiko leve. E agensia diplomátiko di Canada a bisa den un komunikado ku e tèstnan médiko a konfirmá su di 14 kaso.
Canada a señalá den novèmber ku e pais ta konsiderando tur opshon pa ku su embahada na Cuba despues ku a konfirmá e di 13 kaso. Canada lo redusí su personal di 16 na ocho empleado den e embahada na La Habana.
E 14 kanadesnan afektá ta inkluí diplomátikonan i algun miembro di nan famia. Un funshonario kanades a bisa den un rueda di prensa ku e kaso mas resien ta involukrá un diplomátiko ku a yega e pais meimei di aña 2018 i haña e síntomanan riba 29 di desèmber. E funshonario a bisa ku e kasonan konfirmá ta mustra ku e insidente ta sigui sosodé.
Canada lo mantené su embahador na La Habana i outoridat a agregá ku lo sigui brinda tur servisio konsular pa e kanadesnan.
Cuba ta un destino turístiko popular entre e kanadesnan, i e gobièrnu di Canada a bisa ku no tin kasonan konosí di afekshonnan similar di salú entre biaheronan kanades.
Un funshonario di gobièrnu kanades a bisa den e rueda di prensa ku Cuba a kooperá desde prinsipio i a señalá ku outoridat kubano ta mesun fadá ku esnan di Canada. Un funshonario a señalá ku e relashon kanades ku Cuba ta hopi fuerte.
