BARCELONA, AP.- Diferente wèlga i marcha a paralisá e region di Catalonia djabièrnè, inkluyendo esaki su kapital Barcelona. Ayera tabata e di sinku dia di protesta kontra kondena di e dirigentenan ku ta boga pa independensia di e region.
Outoridat sentral a bisa ku a kanselá 57 buelo i ida i buèlta pa e region debí na e wèlga general deklará pa sindikatonan na fabor di independensia. Vários persona a sera kareteranan ku ta krusa frontera di Fransia i Pirineos i a kima tayer i instalá barikadanan den diferente parti di e region.
E region a registrá disturbionan den diferente parti di e siudat. Outoridat di salú a bisa ku 42 persona a resultá heridá, ku mayoria den e kapital. Polis regional a arestá 16 manifestante, ocho ta detené ainda.
E minister interino di Interior, Fernando Grande-Marlaska, a bisa djabièrnè ku outoridat ta tene gruponan minoritario organisá na bista komo ku esakinan “ta provokando insidentenan na sitionan spesífiko”, el a sigurá ku “nan lo wòrdu sanshoná”. Outoridat a arestá mas di 200 persona desde ku e movementu separatista a bolbe bira aktivo despues ku nuebe polítiko i aktivista separatista a wòrdu kondená.
Spaña kier akusá e presidente di e region, Carles Puigdemont ku malversashon di fondo públiko. Puigdemont a hui pa Bruselas na final di 2017 despues di un intento frakasá pa krea un repúblika nobo den e region.
