CHICAGO, AP.- Funshonarionan di bienestar di menornan ta investigando “akusashonnan” di negligensia despues ku nuebe mucha a muri i un mas a terminá den estado kritiko den un kandela den un apartamentu na Chicago, segun e agensia estatal djamars.
E bosero di Departamento di menor i Famia di Illinois, Alissandra Calderon, a ninga di duna detaye di e enfoke di e investigashon. E no a duna splikashon riba e negligensia tampoko. Pero un pregunta klave sin kontesta ta, dikon no tabatin adultonan den e apartamentu di Southwest Side na momentu ku e kandela a devorá e sitio.
E bosero di Departamento di Bombero di Chicago, Larry Langford, a bisa djaluna ku despues di kere ku dos di e víktimanan tabata adulto, investigadónan a determiná ku tur tabata menor, di entre tres luna i adolesente. Nuebe a muri i un mucha di 14 aña tabata den estado krítiko djamars.
Den un mensahe manda na The Associated Press, Calderon a bisa djamars ku vários famia a wòrdu afektá pa e kandela. el agregá ku e agensia estatal no tabatin investigashonnan pendiente riba e famianan na momentu di e insidente.
Segun Langford, e investigashon a revelá ku e 10 muchanan a pasa anochi huntu den e kas i a wòrdu sofoká pa e kandela miéntras nan tabata drumi. Nan no a lanta pa skapa di e kandela kual ta loke a mata nan.
