SANTIAGO DE CHILE, AP.- Seis persona a fayesé djamars despues ku e avioneta kual nan tabata aden a kai riba un kas den un sektor residensial na Puerto Montt na sùit di Chile.
E alkalde di e lokalidat, Harry Jurgensen a informá ku tabatin dos muhé, tres hòmber i e piloto na bordo di e avion ku a kai.
Despues ku el a despegá di e aeropuerto, e avioneta La Paloma a kai riba un kas, kousando un gran kandela ku a destrosá e kas. E kandela a kousa daño serio na un otro bibienda, segun indikashon di e bombero Boris Johnson.
El a agregá ku e bomberonan a opservá un persona saliendo for di un di e kasnan afektá pero e persona aki no a duna indikashon di a wòrdu heridá.
Outoridat regional a bisa ku un persona serka di e kas a haña heridanan leve na su pia. Un di e doñonan di e kas, Andres Sepulveda, a indiká ku no tabatin niun okupante den esaki.
E avioneta su tanki tabata kompletamente yen ku kombustibel dor ku el a lanta algun minüt promé ku e aksidente.
