SANTIAGO DE CHILE, AP.- Presidente Sebastian Piñera a bisa djaluna ku e gobièrnu no ta deskartá un partisipashon estranhero den e konvulshon sosial ku ta afektando Chile ya pa dos luna kaba. E presidente ta indiká ku e posibel partisipashon aki tabata den forma di akshonnan koordiná i manehá desde eksterior.
Entrevistá pa periodistanan di e asosiashon di radioemisora chileno, Piñera a respaldá e lider máksimo di polis, kual ta akusá pa entidatnan internashonal i lokal pa violá derechi humano di e manifestantenan durante represhon di e protestanan multitudinario.
E chilenonan kier mehorashonnan sosial i pa kambia e konstitushon formulá desde e diktadura militar di Augusto Pinochet (1973-1990).
E presidente ta sigurá ku manifestantenan a kima shete stashon di metro i 30 supermerkado entre otro. “Esaki ta nifiká ku ku no solamente tin maldat, pero teknologia tambe a hunga un ròl i tur informashon ku a paresé riba retnan sosial, kasi tur kordinashon a bini for di eksterior. Definitivamente tin un organisashon”.
Chile a pasa dor di un situashon di káos, spesialmente despues di e promé simannan di protesta ku a kontinuá desde 18 di òktober, na momentu ku e destruí 80% di e 136 stashonnan di metro. E pais a registrá 900 mion dòler di pèrdida pa supermerkadonan den e pais kompleto, inkluyendo algun botika i 15.000 empresa mediano i chikitu. E ekonomia a kolèps den òktober i e pais ta pronostiká unu mas den novèmber.
