PEKIN, CHINA, AFP.- China a eksportá kasi 4.000 mion masker desde komienso di mart pa lucha kontra e epidemia di e coronavirus nobo, segun indikashon di outoridat djadumingu.
Apesar di e disminushon di kasonan riba su teritorio, Pekin a pidi e fábrikanan pa oumentá produkshon di ekiponan médiko miéntras ku otro paisnan ta enfrentando un skarsedat enorme di material. E pandemia di COVID-19 a mata mas di 65.000 persona rònt mundu.
Desde promé di mart, China a eksportá 3.860 mion masker pa mas di 50 pais. E pedido aki a inkluí 37,5 mion trahe di protekshon, 16.000 mashin di hala rosea i 2,84 mion ‘kits’ pa hasi tèst di COVID-19, segun indikashon di Jin Hai di duana.
E eksportashonnan aki tin un balor di 1.330 mion euro. Sin embargo, algun pais a keha tokante e kalidat di ekiponan médiko importá di China.
Ulanda a bisa riba 28 di mart ku 600.000 masker di un lote di 1,3 mion masker di China no ta kumpli ku e normanan di kalidat. E maskernan aki no ta ahustá debidamente na kara i algun filter no ta funshoná korektamente tampoko. China a reakshoná bisando ku e fabrikante a indiká klaramente ku e maskernan no ta kirúrgiko.
Spaña tambe a debolbé míles di tèst di COVID-19 defekto, di un kompania ku no tabatin outorisashon nesesario.
