NASHON UNI, AP.- E embahador di China den Nashon Uni a atvertí djaluna ku un oumento di tenshon den Norkorea ta kore rísiko di sali di kòntròl “i e konsekuensianan lo ta desastroso”.
Liu Jieyi a ekspresá su speransa ku e nashonnan mester ta mas habri i mester respaldá e pakete di China pa aliviá tenshon.
El a reiterá ku un di e proposishonnan inisial importante di e pakete ta “suspenshon pa suspenshon” kaminda Norkorea ta pone fin na su pruebanan nuklear i di misil, miéntras ku Merka i Surkorea ta para nan operashonnan militar.
E temornan di un konflikto den e Península di Korea a oumentá desde ku e lider norkoreano Kim Jong Un a ekspandé su arsenal nuklear i desaroyá misilnan balistiko nuklear. E misilnan aki ta loke su gobièrnu ta sigurá komo algu nesesario pa prevení un invashon merikano.
E embahador di Norkorea den Nashon Uni, a bisa siman pasa ku den 50 aña di konfrontashon, Merka i Norkorea nunka no tabata asina serka di un guera nuklear manera tempu Merka i Sur Korea a realisá ehersisionan militar “agresivo” mas grandi den historia, entre aprel i mei e aña aki.
