NASHON UNI, MERKA, AFP.- China a urgi Merka, Alemania i Bretaña pa kanselá un konferensia di video tokante China su kampaña kontra minorianan mòslem Uyghur, i a pidi otro miembronan di Nashon Uní pa no partisipá na e evento.
Por lo ménos un mion Uyghur i gruponan mòslem ta detené den e kamponan na nortwèst di region Xinjiang, segun gruponan di derechi humano, kual ta akusá outoridat di sterilisá e muhénan i imponé trabou fòrsá.
E video konferensia, programá pa mañan ta “basá riba engaño i duda polítiko”, asina un diplomátiko chines ku ta representá e pais den Nashon Uní a bisa. “Beijing ta urgi tur spònser pa kanselá e evento aki inmediatamente pa motibu ku e ta interferí ku asuntunan interno di China, i ta pidi pa otro estadonan miembro rechasá e evento aki”.
Aparte di e kamponan, miónes di mòslem mas den China ta biba bou di un sistema di kontrol i vigilansia. Merka a deklará resientemente ku e trato kontra Uyghurnan ta “genosidio”.
