DES MOINES, IOWA, MERKA, AP.- Hillary Clinton ta tresiendo Al Gore komo su spesialista na kabes di e kambio di klima, na momentu ku e lucha pa apelá votadónan hóben tabata tuma e tema komo un prioridat.
Gore, visepresidente durante 8 aña di presidensia di Bill Clinton i aktivista ambiental, lo papia djamars mas despues huntu ku e kandidato presidensial demókrata na Miami. Den e evento, Clinton lo enfatisá su plannan di desaroyá mas energia no kontaminante, redusí produkshon di kombustibel i konstruí mas infrastruktura resistena na klima. Clinton tambe lo sigui ataká su oponente republikano Donald Trump.
Djaluna anochi, Clinton a bisa den Universidat Estatal di Ohio: ‘Mi ta kompetiendo kontra un hende ku no ta kere den kambio klima segun el a bisa. El a asta agregá ku esaki ta un engaño di chinesnan”.
Durante e kontienda primario kontra e senador progresista pa Vermont Bernie Sanders, Clinton a ofresé plannan di energia no kontaminante i a pronunsiá kontra e oleodukto Keystone XL, kual ambientalistanan ta oponé kontra dje. Trump a kuestioná kambio di klima vários biaha i a bisa ku e tin plania di ‘bolbe negoshá’ e akuerdo Klimatiko di Paris, un tratado internashonal pa kombatí oumento di kalentamentu rònt mundu.
Mundu ta eksperimentando un kalor rekòr, kibrando esnan di 2015, 2014 i 2010. Esaki ta 1,8 grado Fahrenheit mas kalor ku un siglo pasa. Sientífikonan a vinkulá e kambio di klima komo kousa di aktividat humano ku olanan mortal di kalor i sekura i áwaseru ku ta kousa inundashonnan.
Gore a eksplorá e kalentamentu den su dokumental “An Inconvenient Truth”, di 2006.
