CARACAS, AP.- Seguridat ta investigando un supuesto kòmplòt pa asesiná e presidente di Colombia Ivan Duque. Esaki ta posiblemente relashoná ku e kaso di tres venezolano ku a wòrdu detené ku arma di guera, segun konfirmashon di e kansier kolombiano Carlos Holmes Trujillo djasabra.
“Ku preokupashon inmenso” i rechaso “mi mester informá boso ku pa vários luna kaba tin investigashonnan andando pa resolvé e posibel atentadonan kontra bida di e presidente”, asina e kansier a indiká den un video publiká atraves di su kuenta di Twitter.
“Ta trata di e kaptura di tres siudadano venezolano ku a haña poseshon di armanan di guera”.
Dos di e venezolanonan a wòrdu kapturá riba 21 di desèmber na Velledupar, kapital di departamento Cesar, segun indikashon di emisora Blu Radio.
E terser persona a wòrdu detené na Barranquilla, 700 kilometer na nort di e kapital kolombiano. E tabatin un arma outomátiko mini uzi di 9 milimeter i algun granada, segun indikashon di e emisora.
No tabatin un reakshon inmediato di parti e gobièrnu di Venezuela.
Holmes a pidi e pueblo pa kompartí kualkier informashon ku ta pone seguridat di e mandatario na riesgo. Ademas, el a gradisí e kooperashon di agensianan di inteligensia estranhero, no identifiká pa yuda protehá Duque.
