LONDON, AP.- E tasa di kasonan nobo di ébola a bira dòbel segun òktober ta pasando, kompará ku sèptèmber kompleto, despues di a suspendé yudansa di nortost di Congo, debí na violensia insurgente. Asina funshonarionan di salú a bisa djamars.
Den un komunikado, e Komité Internashonal di reskate IRC, a indiká di ta “alarma” pa e 33 kasonan nobo registrá entre promé di òktober i djamars. E kantidat tabata 41 den sèptèmber kompleto.
Mayoria di e kasonan nobo a wòrdu reportá na Beni, kaminda ekspertonan mester a suspendé labornan pa kontené ébola durante vários dia debí na un atake rebelde. Funshonarionan di salu a bisa ku nan ta praktikamente trahando den un zona di guera debí na e presensia di vários grupo armá aktivo den e region.
“Esaki ta un señal ku no solamente e brote ta for di kontròl, pero sin e partisipashon integral di e komunidat kosnan por bira pió”, asina dòkter Michelle Gayer a indiká, direktor di emergensia di salú IRC.
E siman aki, Organisashon Mundial di Salú a indiká ku tur trahadó di salú ku a haña ébola durante e epidemia aki, a wòrdu infektá pafó di e hospital òf klínikanan. Esaki ta nifiká ku e vírus ta propagando den e komunidat. Te ainda 19 trahadó di salú a haña e malesa aki.
