CAIBARIEN, CUBA, AP.- Orkan Irma a ranka vários dak i daña kostanan na nort di Cuba despues di asotá islanan den Karibe. E orkan a laga un rastro di destrukshon ku por lo ménos 22 morto te ainda.
Djasabra anochi, miéntras Irma tabata dirigiendo su bientu potente pa Florida, outoridat di e isla tabata evaluando e konsekuensianan i a atvertí di dañonan grandi na kosta nort, dañando sentronan di fakansi i siudatnan.
Te ainda no tin indikashon di morto na Cuba, un pais ku ta orguyoso pa su preparashon pa e tipo di desasternan aki. Outoridat a purba restourá elektrisidat i limpia kayanan na momentu ku nan ta atvertí pueblo pa no sali riba kaya na La Habana debí na inundashonnan ku por kontinuá te djaluna.
E habitantenan di “e kapital mester sa ku e inundashonnan ta bai dura sigur pa 36 ora mas”, asina e koronèl di Defensa Sivil, Luis Angel Macareno a indiká djasabra anochi. El a agregá ku awa a drenta 600 meter den La Habana.
Despues di Irma su yegada, sòldatnan kubano a pasa na vários kosta obligando su residentenan pa sali i hibando tur hende pa refugionan den edifisionan gubernamental, skol i asta kueba.
Imágennan di video na nort i ost di Cuba a mustra palunan ku a kai i daño grave di daknan di kas. Testigunan a bisa ku un museo provinsial serka di e vortise di e orkan a keda na ruina. Den siudat di Santa Clara, 39 edifisio a basha den otro segun indikashon di outoridat.
Mas di 5.000 turista a wòrdu evakuá di kosta nort i sentral di e isla.
