NEW York, AP.- E debate di Donald Trump i Hillary Clinton tabata esun mas mirá den historia di Merka.
No tin un kalkulo ainda di e kompania spesialisá Nielsen di e sifra definitivo di e oudishon. Sinembargo, segun proyekshonnan preliminar di 11 ret ku a transmití e debate e sifra final ta alkansá 81.4 mion di espektador i ta superá e sifra ku tabata vigente pa 36 aña kaba.
E rekòr anterior di espektadornan pa un debate presidensial a alkansá 80.6 mion di persona i a korespondé na e úniko ku tabatin na 1980 entre e demókrata Jimmy Carter i su kontrinkante republikano Ronald Reagan. For di e tempu ei niun debate entre e kandidatonan presidensial merikano no a superá 70 mion di espektador.
Pa loke ta kontenido di e debate, esaki ta varia. Hopi ta haña ku Trump tabata masha malu den e debate di djaluna anochi. E último akontesimentunan relashoná ku e elekshonnan presidensial na Merka ta bisa lo siguiente;
Republikanonan mes lo a bisa ku Trump tabata defisiente den su kontestanan. Senador Jeff Flake di Arizona a bisa “ora bo tira falta riba e mikrofon, ta pasobra bo ta serka di rekonosé ku bo tabatin un nochi malu” Trump a bisa ku su mikrofon tabata sende i paga durante di e debate ku e demókrata Hillary Clinton i tambe ku esaki a keda ahustá na un volúmen abou. E ke sa si e moderadónan a hasi esaki pa malu. E presidente di Kámara di representante Paul Ryan a elogiá e desempeño di Trump den e debate i a sigurá ku Trump a demostrá ku e por bai man na man ku Hillary. Ryan sinembargo a nenga na komentá riba e komentarionan di Trump e siguiente dia insultando Miss Universo di 1996 Alicia Machado pa a oumentá di peso.
Ryan a bisa ku e no a mira e deklarashonnan ei. Otro republikanonan a mustra desepshoná ku e aktuashon di Trump i a sigurá ku el a pèrdè e oportunidat di ataka Clinton riba su fundashon i otro temanan.
