WASHINGTON (AP).- Ainda gobièrnu di Merka, e atministrashon di Presidente Donald Trump no tin fin di bini kla ku un solushon pa e problema dje muraya ku e ke haña plaka pa e konstruí. Pero miéntras e popularidat di Trump ta bahando, e mes tambe ta skondí, no por mira Trump niun kaminda. No tin ningun sorto di reunion di mesa rondó huntu ku su sekretarionan di Gabinete, niun deklarashon straño for di su helikòpter di Marine One, kasi niun Tweet tampoko.
Unda e presidente ta? Miéntras ku gobièrnu federal ta bek den operashon, Presidente Trump si tabata tras di porta sera, mandando Tweetnan si for di su residensia ofisial, pero tòg fo’i bista públiko.
Pero tantu Republikanonan komo Demókratanan ta satisfecho por lo pronto ku e aktitut aki di Trump, ya ku asina legisladornan ta haña espasio pa nan por yega na algun dil pa tene gobièrnu habri i asina resolvé un konflikto ku tin riba e posishon di e presidente kende ta insistí pa haña plaka pa por konstruí e muraya. Pero tin legisladornan ku ta kere ku ménos Trump mete den e asuntu aki ta mas mihó tambe pa por yega na un palabrashon i solushon.
Den e último siman aki Trump no tabatin ningun evento públiko i e no tabatin nada riba su skema públiko di djaweps, aunke el a kuminsá mainta ku un kantidat di Tweet ku ta bai den direkshon di Senado ku a ofresé un plan pero sin niun depchi pa traha su muraya. Trump a duna di konosé kaba ku un dil sin fondo pe muraya no tin sentido!
