CARACAS, VENEZUELA, AP.- E korporashon estatal di Petroleos de Venezuela S.A., atraves di algun di su filialnan, a suskribí un kontrakt pa eksportá 50 mion di barí di gas pa dia pa Colombia, entrante promé di desèmber. E akuerdo por duna e empresa en kuestion un aliento tras di e ekonomia difísil ku e ta pasando aden. E presidente di e filial di PDVSA Gas, Antón Castillo, i e gerente general di e kompania Petromil Gas S.A., Carlos Henao, a firma un kontrakt pa eksportashon di gas natural pa Colombia pa medio di tuberia, ku lo keda inisiá for di promé di desèmber, asina un komunikado emití pa PDVSA a indiká. Castillo ta konsiderá e kontrato komo un “gran paso” debí na ku ta promé be den historia di industria petrolero venezolano ku lo eksportá gas natural pa medio di tuberia.
PDVSA a konstruí den aña 2007 un viadukto di gas ku ta konektá ku e zona petrolero di e lago di Maracaibo, den e estado nort oksidental di Zulia, ku e departamento kolombiano di La Guajira. Den e promé fase di e plan, Venezuela a importá gas di Colombia te ku yüli di 2015. Despues komo parti di e programa premirá, Venezuela lo eksportá pa Colombia. Asina den un Segundo etapa segun PDVSA, ku a mira kon el a bai atras den último añanan pa e kaida di preis petrolero i su produkshon, lo kuminsá den desèmber na pòmp gas pa e pais bisiña.
E ingresonan di PDVSA a yega na 2015 na 72.169 mion di dòler, loke ta representá un retraso fuerte kompará ku 121.895 mion di dòler ku a logra na aña 2014 segun estadístika finansiero. E bahada di ingreso a generá un impakto fuerte den ganashi integral di e korporashon ku a sera den 2015 na 2.588 mion di dòler, loke a representá un kaida un di 79% na komparashon di ganashinan di 2014 ku tabata na 12.465 mion di dòler.
