COPENHAGEN, DINAMARKA, AP.- Dinamarka lo kumpra informashon filtrá di un bufete legal panameño ku a yuda klientenan habri kompanianan na Panama. Asina e minister di impuesto a indiká.
Kartsen Lauritzen a bisa ku outoridatnan tributario danes a risibí un oferta anónimo pa atkerí informashon di Papel di Panama ku por involukrá 600 persona. E ministerio a bisa ku e komunikashon ku fuentenan anónimo a wòrdu realisá via kanalnan kodifiká.
Lauritzen ta bisa ku ” tur kos ta indiká di informashon útil”, i ” nos debe tur e kontribuyentenan danes pa paga nan impuesto manera mester ta”.
” Nos mester tuma e medidanan nesesario pa kapturá esnan ku ta evitá impuesto ku ta skonde fortuna den, por ehèmpel, Panama”, segun indikashon di Lauritze.
Sin duna detaye, el a bisa ku por bini algun problema fundamental asosiá ku e kompra di informashon filtrá i ku outoridatnan di impuesto mester ta kouteloso.
El a agregá ku otro partidonan den Parlamento a respaldá e kompra di dokumentonan, ku ta parti di un archivo enorme filtrá di bufete Mossack Fonseca.
E informashon, ku ta konsistí di dokumentonan riba 11,5 mion propiedat, a wòrdu entregá originalmente na un korant aleman. Esaki a kompartí e informashon ku un ret global di periodista investigador, loke a generá un serie di reportahe den prensa den luna di aprel. Den mei, periodistanan a publiká nòmber di 200.000 entidat disponibel den un base di dato.
No ta konosí si Dinamarka ta e promé pais ku ta kumpra òf duna datonan adishonal di loke a keda publiká.
E reperkushonnan di e filtrashon tabata amplio. E indignashon a kousa renunsia di e promé minister di Islandia i preshon riba gobernantenan di Argentina i Ukrania, polítikonan chines, presidente ruso Vladimir Putin i su amigunan.
