WASHINGTON, AP.- E diplomátiko di Merka pa Venezuela a indiká djárason ku tardi òf trempan, Nicolás Maduro lo renunsiá dor di e preshon internashonal.
Elliot Abrams no a spesifiká pa ki temporada esaki por sosodé, pero el a sigurá ku “tin un tormenta” den e gobièrnu venezolano i ku e mandatario “lo no bai soportá esaki muchu largu”.
Abrams a papia dilanti di Komishon di Relashon Internashonal di Kámara di Representante, mas o ménos un luna despues ku e gobièrnu merikano a tuma e desishon pa rekonosé e lider opositor Juan Guaidó komo presidente interino.
E diplomátiko a sigurá ku e sanshonnan petrolero di parti di Merka a kuminsá afektá Venezuela su ekonomia i ku e produkshon di petroli lo wòrdu redusí na mitar pa final di e aña aki.
Ademas, Abrams a hasi un petishon pa e militarnan na Venezuela stòp di obedesé òrdunan di Maduro.
