BENI, REPUBLIKA DEMOKRATIKO DI CONGO, AP.- E personal médiko ku ta kombatí ébola den Repúblika Demokrátiko di Congo a buska refugio djamars den e siudat oriental di Beni despues ku residentenan furioso a saka un base di forsa di pas di Nashon Uní, pa protestá kontra atakenan rebelde, segun indikashon di Organisashon Mundial di Salú. Por lo ménos kuater manifestante a muri, segun indikashon di un funshonario lokal.
Kada dia ku e trahadónan di salú no tin akseso na áreanan afektá ku ébola, esaki ta kombertí e segundo brote mas pió di e enfermedat den un “tragedia”. Asina e direktor general di OMS, Tedros Adhanom Ghebreyesus a tweet. El a agregá ku e violensia no ta dirigí kontra OMS ni un reakshon kontra ébola en general.
E residentenan di Beni ta furioso ku rebeldenan ta sigui lansa atake mortal apesar do Nashon Uní su presensia di pas i trupanan kongoles. Algun ta eksihí pa e mishon di Nashon Uní aktua kontra e rebeldenan òf sali for di e pais.
Outoridat a deskubrí kadaver di kuater hóben manifestante serka di e base di Nashon Uní despues di e atake di djaluna, segun Kumbu Ngoma di e korte militar di Beni. Ta investigando kousa di e mortonan. Seis sòldat kongoles tambe a haña herida di bala serka di e base, segun Ngoma a sigui bisa.
