WASHINGTON, MERKA, AFP.- Presidente Donald Trump a ‘claim’ djaluna ku e tin poder ‘apsoluto’ pa fòrsa gobernadornan di estado i alkaldenan pa anulá e medidanan di karentena i distansiamentu sosial.
Trump a atvertí na gobernadornan i lidernan lokal ku e por intervení, si nan insistí pa mantené nan propio reglanan pa prevení propagashon di e vírus. “Nan no por hasi nada sin aprobashon di e presidente”, asina Trump a bisa.
“Ora un hende ta presidente di Merka, e tin outoridat total”, asina el a bisa. “Mi ta preferá di traha huntu, pero mi tin e poder pa hasi esaki si ta nesesario”, asina el a añadí.
E Konstitushon Merikano ta indiká ku podernan no spesífikamente entregá na e gobièrnu federal òf e presidente a wòrdu reservá pa 50 estado. Esaki a kousa hopi disputa legal durante vários aña tokante ken por hasi kiko. E disputa mas resien ta Trump su esfuersonan pa fòrsa estadonan pa kombatí migrashon ilegal, pero ku sero toleransia.
Ekspertonan legal a bisa ku nada den Lei merikano ta stipulá ku e presidente òf gobièrnu federal por fòrsa un estado pa anulá su propio polítika.
