NEW YORK, MERKA, AFP.- Un ofisial di polis retirá di New York i dos siudadano chines a wòrdu kondená pa nan partisipashon den un plan pa repatriá chinesnan residente di Merka. E kaso ta konosí komo “Operashon Fox Hunt”.
Michael McMahon, di 55 aña, huntu ku Zhu Yong (66) i Zheng Congying (27), a wòrdu deklará kulpabel pa un hurado federal despues di un proseso di tres siman, segun indikashon di e fiskal federal di Distrito Ost di New York den un komunikado.
A kondená McMahon, un agente polisial retirá ku a bira un investigadó privá, pa aktua komo un agente di gobièrnu chines, konspirashon pa kometé intimidashon den diferente estado i pa intimidashon interestatal.
Zhu, residente di distrito di Queens, a wòrdu kondená pa e mesun kargo, miéntras Zheng Congying, ku ta biba den distrito di Brooklyn, a keda kondená pa konspirashon pa kometé intimidashon interestatal i intimidashon den diferente estado.
Ofisina di Fiskal di Merka a indiká ku McMahon i Zhu, a kuminsá ku un kampaña pa forsa residentenan riba teritorio di Merka pa nan regresá China. Segun outoridatnan esaki a sosodé bou di òrdu di e gobièrnu chines.
E akshonnan aki tabata parti di un “esfuerso di repatriashon global i ilegal di China konosí komo “Operashon Fox Hunt”.
